
Daxuyanî: dayîna nasnameyê û mafê nesebê ji dayika sûrî re – hemwelatîbûneke tam, ne bazara ji jor ve
Tiştê ku di van demên dawî de li ser destûrdana dayîna nasnameya sûrî ji zarokan re bi rêya dayikên wan tê gotin, her çend ji derve ve wekî bersivdana daxwazeke femînîst û mafparêz a ku demeke dirêj li bendê bû xuya bike jî, bi şertê “tomarkirina zewacê li ser axa Sûriyeyê” naveroka xwe ya rizgarîxwaz winda dike û dibe amûreke nû ya cezakirina siyasî û cudakariya demografîk.
Ev şertê astengker bi zanebûn trajediya bi sed hezaran malbatên sûrî yên ku şer ew koçber kirine paşguh dike, û bi hezaran dayikên ku ji ber zewacên netomarkirî, an windabûn û kuştina mêrên xwe, bi tena serê xwe li hember çarenûsa xwe û ya zarokên xwe man, dûr dixe – ji bilî dayik û zarokên bênasname yên ku ji belgeyên nasnameyê bêpar in, li hundir û derveyî welêt.
Em wekî rêxistina “Amargî” li ser van bingehan israr dikin:
- Hemwelatîbûna wekhev û bêşert: mafê dayika sûrî ku nasnameya xwe bide zarokên xwe, mafekî bingehîn e ku ji hemwelatîbûnê nayê veqetandin; divê ji bo hemû jinên sûrî bêyî sînor û şert were naskirin, ji cihê niştecihbûna wan an rewşa zewaca wan serbixwe.
- Mafê nesebê yê sivîl ê serbixwe: em girêdana hebûna qanûnî ya zarokê bi bavê nenas an winda re red dikin, û daxwaza qanûneke zelal dikin ku nesebê zarokê bi dayikê re yekser di qeydên nifûsê de nas bike, da ku mafê wî yê mirovî yê nav û nasnameyê were parastin û ji bêparkirina ji mafan were dûrxistin.
- Rawestandina marjînalkirina sîstematîk: bêparkirina zarokan ji belgeyên wan ên nasnameyê, biryareke pêşwext e ku ew nexwende bimînin û ji mafê perwerde û lênêrîna tenduristiyê bêpar bin, û wan dixe nav pençeyên îstîsmara aborî; em vê yekê wekî sûceke civakî dibînin ku sîstema desthilatdar ji bo kûrkirina perçebûna tevna civaka Sûriyeyê birêve dibe.
Şerê hemwelatîbûna tam û hilweşandina qanûnên baviksalarî yên cudaker ne mijara guhertinên şeklî yên perçe-perçe ye; ew beşek ji têkoşîna giştî ye ji bo hilweşandina avahiyên zordarî û cudakariyê û avakirina Sûriyeyeke edalet, azadî û rûmeta mirovî.



