الخط الأمامي✪ 
Partiya Çepa Şoreşger li Sûriyê êrîşên ku li bajarê Siqêlbiyê pêk hatine şermezar dike. Partî van êrîşan wekî berdewamiya nêzîkatiyekî çewisandinê ya sîstematîk dibîne ku ji aliyê desthilatdariya de-fakto ve tê meşandin; yanî bermahiyên El-Qaîde bi serokatiya El-Colanî û HTŞ’ê. Vê desthilatdariyê heman amûrên zordarî û tundiyê yên rejîma tûxme ya berê dîsa hilberandin, her çend dirûşmên wan cuda bin jî.
Tiştê ku qewimî ne bûyereke tenê ye, lê belê di çarçoveya avahiyeke otorîter de ye ku xwe dispêre terorê û bindestkirina civakê bi hêza çekan, ligel mayîna bêcezakirinê. Ev yek bi hewldana vê desthilatdariyê ya ji bo ferzkirina dubendiyeke îdeolojîk di navbera Sûriyan de tê meşandin, da ku ji cewherê şerê çînayetî birevin. Li wir welat di rastiyekê de tê sînordarkirin ku tê de kêmneteweyek çekdar dest datîne ser dewlemendiyên Sûriyê, li hemberî piraniyek xizan û bêvîn.
Di vê çarçoveyê de, Partî hişyariyê dide ku gel neyê kişandin nav tundiya navxweyî (şerê sivîl), ya ku bi awayekî rasterast an nerasterast bi rêya gotara teşwîqkar û kiryarên ku ber bi pevçûnên navxweyî ve dibin, tê xwedîkirin. Ev yek tenê xizmeta çespandina kontrolê û dubarekirina serdestiyê dike. Parçebûna civakî ne qeder e, lê amûrek e ku ev desthilatdarî bi kar tînin da ku her îhtîmaleke çalakiya gel a serbixwe qels bikin.
Her wiha, Partî bi tundî polîtîkaya xapandinê û serobinkirina rastiyan a ku desthilatdarî û saziyên wê yên medyayê dimeşînin, red dike. Hewldanên rewakirina êrîşan bi rêya çîrokên ku qurbaniyan sûcdar dikin û wan wekî êrîşkar nîşan didin dubare dibin; ev yek nîşana bêkêfîbûna vê desthilatdariyê ye di rûbirûbûna daxwazên gel an naskirina berpirsiyariyên xwe de.
Em piştgiriya xwe ya tam ji bo xwepêşandanên gel ên li dijî tawanên desthilatdariyê yên li bajarê Siqêlbiyê û çend bajarên din ên Sûriyê diyar dikin. Em piştgiriya mafê Sûriyan di xwepêşandana aştiyane û rûniştinê de dikin, wekî rêyên rewa ji bo parastina rûmet û mafan, û şikandina bêdengiya ku bi darê zorê hatî ferzkirin.
Em bang dikin ku rêxistinkirina siyasî ya serbixwe were xurtkirin û çarçoveyên kolektîf ên ku dikarin li dijî çewisandinê bisekinin werin avakirin. Divê daxwazên gel dûrî polariyzasyonên tayifî an etnîkî werin yekkirin, da ku rê ji bo alternatîfek demokratîk ku berjewendiyên gelê Sûriyê nîşan dide, vebe.
Rûbirûbûna zordariyê, bi her şêwe û dirûşmên wê be, hişmendî, rêxistinbûn û vîneke kolektîf dixwaze ku çewisandin û tundiya navxweyî bi hev re red dike, û asoyekê ji bo guhertineke rastî ya li ser bingeha azadî û edaletê vedike.
Hemû Desthilatdarî û Dewlemendî ji bo Gel e,
Partiya Çepa Şoreşger li Sûriyê
28/3/2026
About Author
